مش غريبة

موضوع: مش غريبة الإثنين نوفمبر 26, 2007 10:17 pm

مش غريبه انك تحب وتنجرح
لكن الغريبه انك تحب جلادك ؟؟
ومش غريبه انك تتباع بالرخيص
لكن الغريبه انك تشتري اللي باعك ؟؟
ومش غريبه لو عهدك اتخان
لكن الغريبه انك تحفظ عهد اللي خانك ؟؟
ومش غريبه لو عشقت الهوا
لكن الغريبه انك تحاول تمسكه بأيدك
ومش غريبه لو حزنك كبر
لكن الغريبه انك تفرح بيه
وتحاول تلبسه توب عيدك
ومش غريب كل ده
لكن الغريب اني انصحك
وانتا قلبك شاعر
والمشاعر جواريك وعبيدك
معقول قلب طاير يخدعك ؟
وانتا اللي كنت صياد وماهر وصيد القلوب لعبتك
طب سيبك من الدمعه الزايفه عند الفراق
واللهفة الزايفه عند اللقا
سيبك من انك شفت القسوه في عنيها
وبرضه جريت عليها
طب اديك قربت ليها
وسكنت حكاويها
لساك بتحن ليها

والحب يا صاحبي
بيبقى قدر وانكتب
اه قدر وانكتب
والحب مش جنينه دايماً بتطرح ورد
لا دا دنيا وفيها العجب
فيها حب عصري
وحب رجعي
وحب جنتل مان
لا كن دا كله
ارض بور
ما بتطرحش غير تعب
سيبك بقا من اللوم والعتب
وقولي هانشوفها امته
يااااااااااااااااااااااااااااااااااااااااااااااااا اه
لساك بتحبها
لساك بتحن لجلادك ؟؟؟
يا أخي حرام عليك
لا لا مش حرام
لا مش حرام
انت اصلك واخد علي الألام ولو نسيت
افكرك
من كام سنه
ومن كام سنه زرعنا في الزمان اشواق وقولنا للفراق
خليك بعيد خليك في العدم
وبدرنا فوق السحاب اشجان
وقولنا بكره
تكبر وتصبح لحبنا علم
صحيح كنت اسمع عن شيء جديد اسمه الخيانه
لكن ما جربتوش
عشان دي كانت اول خطوه ليه في دنيا الهوا
واللي ما عرفتوش
ان الخيانه
لازم تكون من الحبيب
من القريب
من اللي منك
من اللي ليك
وفجأه عرفت كل ده وخدت درس
وشوقي اللي كان له صدي فجأه انخرص
وسحاب هيامي نار الخيانه دوبته
ومافضلش منه غير نقطه صغيره
وعلي صغرها
عملت منها للعذاب غنوه
وسمتها
نهاية نقطة مطر
الغنوه من محلاها عجبتني
وقولت هافضل كده
دايماً بين القلوب علي سفر
لكن مش اي قلب
مش اي قلب هايكون محطتي
ولا اي دقه هاتنفع لحن لغنوتي
لازم يكون قلب قاسي يقدر يموت ضحكتي
قلب ظالم يخنق شمس ايامي
ويطفي الشموع في سكتي
ساعتها بس
ساعتها بس شعري هاينور
وتشوفه كل الناس
ساعتها بس شعري هايتكلم
هايترجم كل احساس
عرفت ليه انت لسه ماشي السكةدي ؟؟
عرفت ليه انت لسه عاشق جلادك؟؟؟

مش غريبه
صح
مش غريبه

اتمنى ان يكون كلامى وصل يا أصحابى